David Copperfield que hè desaparéisher la Ròca deu Pilat e que l’envia tau Saharà

24 novembre 2014  Sciéncia, Societat

Duna deu Pilat

Lo gran magician, au parat de las soas vacanças a Arcaishon, qu’a decidit de har ua cascarrejada, ua farlabica aus poblans deu parçan en har desaparéisher la famosa tuca deu Pilat, aperada tanben Ròca Blanca peus indigènes.

Un còp de magia de tròp entau David Copperfield qui n’acaba pas de se’n desencuzar dens los medias locaus e adara internacionaus:

« Que soi desolat… Que volèvi sonque har desaparéisher la duna dinc au matin e après la tornar hicar en plaça, los toristas n’aurén pas dit arren e los professionaus deu torisme tanpòc… ».

Problèma: quan lo magician se desvelha au matin ne sap pas mei on a hicat la tuca. Que calerà esperar mieidia e ua boeita de Doliprana entà que’s brembe: « la tuca be l’ei enviada au Saharà! »

Abans que l’esmalicia puja tròp hòrt dens lo País, mejans umans e materiaus deus grans que’s hican en plaça uei. Ua equipa de 580 cercaires e laborantins qu’arribarà doman a Tomboctó mentre que las autoritats africanas pertocadas qu’an anonciat hicar de costat las tensions dens la zòna e desplegar sordats entà tornar trobar la Ròca Blanca. « La diferéncia de color deu sable e la soa compausicion que poderén perméter de la gahar pro viste tan qui n’i aja pas tròp de ventòla. Los satelites qu’auràn tanben ua gran utilitat dens las recèrcas nostas. » çò disen los scientifics.

Que cau saber que lo GAG, Govèrn Autonòme de Gasconha, qu’a prometut 40 000€ e 200 botelhas de vin bordalés entà premiar las e los qui troberàn la tuca.

Lo David Copperfield qu’a anonciat uei enqüèra ua cauma de la magia en esperar lo tornar deu Pilat.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *