Lo motor d’explosion al vin enfin al punt

23 mars 2014  Sciéncia

Motor

L’equipa de Manaset a pogut en exclusivitat ensajar la primièra veitura equipada d’un motor novèl fonccionant al vin. Los jornalistas foguèron estrambordats per aquela descobèrta. Mas caldrà pacientar encara una annada per que lo modèl siá prepausat al public grand.

Lo modèl ensajat es una C4 Picapol fonccionant al vin blanc. La poténcia es correcta, las acceleracions francas e lo freinatge securizant. La tenguda de rota en viratge es remirabla, la en linha dreita a tendéncia a se degradar. Es un veïcul que se mena amb plaser, al punt qu’al cap d’unes quilomètres, tot lo mond cantavan. Mas los tecnicians se demandan s’aquò vendriá pas d’una pèrda dins lo circuït d’escapament qu’emplenariá l’abitacle.

Tres modèls seràn prepausats ; lo de basa foncciona al blanc. Lo modèl intermediari es al rotge ; es mai car a la crompa mas economic a l’usatge, que consoma mens e que lo rotge es mens car al barral. Lo modèl ibrid, de gama superiora, el, podrà indiferentament acceptar rotge, blanc, rosat o vin petejaire. S’estúdia un modèl carburant a la cervesa, mas pel moment, la frequéncia de las voidanças es tròp elevada.

En opcion, se pòt apondre un turbo-distillator que permet de recuperar en fonccion del biais de menar entre 6 e 10 litres d’un aigardent de qualitat onèsta per 10 000 km percorruts.

Lo modèl serà presentat al salon Vinexpo de Bordèu a la dintrada de 2015.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *