Lo burn out reconegut coma malautiá professionala : implicacions dins lo mitan occitan

11 décembre 2014  Sciéncia, Societat

Burn-out

Tanlèu la novèla coneguda, lo sindicat GCT dels trabalhaires occitan s’es inquietat de saber cossí aquò se podiá aplicar al nòstre mitan, e a interrogat las estructuras concernidas.

Lo Congrés Permanent de la Lenga Occitana a sul pic mes l’afar entre las mans dels lingüistes, que se pòt pas reconéisser una malautiá que se trapa pas dins lo diccionari. Aquestes van metre lèu en plaça una comission que rendrà un rapòrt corent 2016.

Lo jornal Manaset a demandat al sol de sos jornalistes disponibles de redigir un atricle. Aqueste s’es rendut sul pic en cò del medecin per se far arrestar.

Radio Pirenèus, tanlèu l’afar sortit, s’es mesa en cèrca d’un estagiari que li podrián balhar lo dorsièr se lo finançament per pagar l’estagi es trapat per 2016 que los dorsièrs per 2015 son clavats..

Lo DIRCOC a lançat un concors a destinacion del public grand que consista a cercar dins los granièrs de papièrs vièlhs tractant de la tematica concernida.

La region Miègjorn-Pirenèus-Lengadòc-Rosselhon-E-Un-Bocin-d-Auvèrnha va estudiar la possibilitat d’atribuïr una borsa de tèsi en socio-lingüistica sus la penibilitat dislossica dins los mestièrs de l’occitan.

L’universitat Pèire Melania respondèt pas que fasián la cauma per reclamar de pòstes.

Lo Febrilitge respondèt qu’aquò concernissiá pas los retirats.

Enfin un emplegat de Caramèl daissèt un messatge sul respondeire a mièjanuèit per dire que tornariá sonar mai tard que li caliá l’endeman a 9 oras èsser a la fièra de las trufas negras de Vilavièlha de Peiregòrd per installar lo taulièr.

Menaçat de burn out, lo sindicaliste es anat se pausar.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *